თარიღი: 15 ნოე 2019

ძვირფასო პრეზიდენტო სტანიშევ,

ძვირფასო გენერალურო მდივანო პოსტ,

ჩვენ – საქართველოს სამოქალაქო საზოგადოების წარმომადგენლებსა და სამოქალაქო აქტივისტებს – გვსურს მოგმართოთ თანამედროვე საქართველოს ისტორიის ამ მნიშვნელოვან მომენტში და გთხოვოთ რეაგირება იმ სერიოზულ გამოწვევებზე, რომელთა წინაშეც დღეს დგას პლურალისტური და მონაწილეობითი დემოკრატია საქართველოში. გამოწვევები უკავშირდება მმართველ პარტია „ქართულ ოცნებას", თქვენი – „ევროპის სოციალისტური პარტიის" (PES) პარტნიორს, რომლის ქმედებების შედეგად გრძელდება სახელმწიფოს მიტაცების პროცესი საქართველოს არაფორმალური მმართველისა და პარტიის თავმჯდომარის ბატონი ბიძინა ივანიშვილის მიერ.

14 ნოემბერს მმართველმა პარტიამ დაარღვია დაპირება საარჩევნო სისტემის ცვლილების შესახებ და პარლამენტში არ დაუჭირა მხარი არჩევნების სრულად პროპორციულ წესზე გადასვლას. ეს დაპირება 2019 წლის ზაფხულში ახალგაზრდების პროტესტის მონაპოვარი იყო; ამ ცვლილების საჭიროებაზე ასევე თანხმდებოდა ყველა ოპოზიციური პოლიტიკური პარტია და სამოქალაქო საზოგადოების ორგანიზაცია. ჩვენ ვიხილეთ დადგმული პროცესი, თითქოს მაჟორიტარი დეპუტატები, რომლებსაც ხელი ჰქონდათ მოწერილი საპარლამენტო ინიციატივაზე (36), "აჯანყდნენ” ცვლილებების წინააღმდეგ. სინამდვილეში, ეჭვი არავის ეპარება, რომ ამ პროცესს თავიდანვე მართავდა „ქართული ოცნების" თავმჯდომარე, ოლიგარქი ბიძინა ივანიშვილი, რომელიც ერთპიროვნულად იღებს გადაწყვეტილებებს მის პარტიაში. მმართველი პარტიის ამ უპასუხისმგებლო ნაბიჯს პოლიტიკური პროცესი პარლამენტიდან ქუჩაში გადააქვს, რითაც საფრთხეს უქმნის საზოგადოებრივ უსაფრთხოებას და სტაბილურობას ქვეყანაში.

მოვლენები დინამიურად ვითარდება, ხალხი ქუჩაში გამოდის, მმართველი პარტია უკვე დატოვა რამდენიმე წევრმა. თუ მმართველი პარტიის მხრიდან არ იქნება დაუყოვნებლივი, ადეკვატური რეაქცია, არსებობს კრიზისის გაღრმავებისა და უკონტროლო პროცესების განვითარების რისკი.

მიგვაჩნია, რომ „ქართული ოცნების" გადაწყვეტილება აშკარად უპირისპირდება საქართველოს მოქალაქეების ნებას და აზიანებს თანასწორობას პოლიტიკურ ასპარეზზე. ამ ქმედებებით „ქართული ოცნება" ეწინააღმდეგება როგორც „ევროპელი სოციალისტების პარტიის" (PES) ფუძემდებლურ ღირებულებებსა და პრინციპებს, ისე პოლიტიკური ქცევის ხუთივე ღირებულებას: „თავისუფლება, დემოკრატია, თანასწორობა, სამართლიანობა და სოლიდარობა" (2013 წლის PES-ის ფუნდამენტური პროგრამა).

საქართველოში მიმდინარე მოვლენების გამო ქართველი ხალხის წუხილიდან გამომდინარე, მიგვაჩნია, რომ „ევროპელი სოციალისტების პარტიას", როგორც ხალხთან ყველაზე უფრო ახლოს მდგომ პარტიას, უნდა ჰქონდეს რეაგირება მისი პარტნიორის ქმედებებზე, რომლებიც არღვევს მონაწილეობითი დემოკრატიის პრინციპებს და მიზნად ისახავს ძალაუფლების შენარჩუნებას ხალხის ნების საწინააღმდეგოდ.

გთხოვთ, თვალი ადევნოთ საქართველოში მიმდინარე მოვლენებს. ასევე, გთხოვთ, ნუ გექნებათ ილუზია და არ მოტყუვდეთ მმართველი პარტიის წარმომადგენლების განცხადებებით, რომ ეს იყო შიდაპარტიული დემოკრატიის დემონსტრირება. სინამდვილეში, ეს არის ოლიგარქ ბიძინა ივანიშვილის მიერ სახელმწიფოს მიტაცების პროცესის გაგრძელება, რომელსაც სურს გაახანგრძლივოს საკუთარი მმართველობა ფსევდოდემოკრატიული პროცესების საშუალებით.

მზად ვართ ნებისმიერ ამ საკითხზე მოგაწოდოთ დამატებითი ინფორმაცია და განმარტება.


ხელმომწერები:


საერთაშორისო გამჭვირვალობა-საქართველო
საქართველოს დემოკრატიული ინიციატივა
საქართველოს ღია საზოგადოების ფონდი
საქართველოს რეფორმების ასოციაცია
ეკონომიკური პოლიტიკის კვლევის ცენტრი
საზოგადოება და ბანკები
საქართველოს ატლანტიკური საბჭო
საქართველოს ფერმერთა ასოციაცია
სტრატეგიული კვლევების რეგიონული ცენტრი
საქართველოს სტრატეგიისა და საერთაშორისო ურთიერთობების კვლევის ფონდი
საქართველოს ახალგაზრდა იურისტთა ასოციაცია
მწვანე ალტერნატივა
კვლევითი ჟურნალისტიკის და ეკონომიკური ანალიზის ცენტრი
საფარი
ადამიანის უფლებათა ცენტრი
სამოქალაქო განვითარების ინსტიტუტი
ტოლერანტობისა და მრავალფეროვნების ინსტიტუტი
ცენტრი ემპათია
მედიის განვითარების ფონდი
სამართლიანი არჩევნებისა და დემოკრატიის საერთაშორისო საზოგადოება
საქართველოს გაეროს ასოციაცია
ინფორმაციის თავისუფლების განვითარების ინსტიტუტი
მსოფლიო გამოცდილება საქართველოსთვის
კონსტიტუციის 42-ე მუხლი
ეკომოკური პოლიტიკის კვლევის ცენტრი
თანასწორობის მოძრაობა
დუშეთის განვითარების ფონდი
ქუთაისის საინფორმაციო ცენტრი
საზოგადოებრივი მონიტორინგისა და კვლევის ცენტრი-ხარაგაული
მედიის განვითარების ფონდი
თავისუფლების ინსტიტუტი
სალომე ბარკერი - აქტივისტი
მარიამ ბაჯელიძე - აქტივისტი
გიორგი მჟავანაძე - აქტივისტი
ზუკა ბერძენიშვილი - აქტივისტი
შოთა დიღმელაშვილი - აქტივისტი
გიგა მაქარაშვილი - აქტივისტი
თათუშა არველაძე - აქტივისტი
მარიამ გეგუჩაძე - აქტივისტი
ნოდარ რუხაძე - აქტივისტი
სოფო კუჭავა - აქტივისტი
ლექსო მაჭავარიანი - აქტივისტი
ჯაბა ზარქუა - აქტივისტი
გიორგი ნონიაშვილი - აქტივისტი
ზაზა აბაშიძე - აქტივისტი
მარიამ დოლიძე - აქტივისტი
თამარ კურატიშვილი - აქტივისტი
გიორგი გაბრიაძე - აქტივისტი
ანა ჭარხალაშვილი - აქტივისტი
გეგი სალუქვაძე - აქტივისტი