დახურვა

თვითრეგულირება

"მაუწყებლობის შესახებ” საქართველოს კანონის მე-14 მუხლისა და მარეგულირებელი კომისიის მიერ 2009 წელს მიღებული "მაუწყებელთა ქცევის კოდექსის” საფუძველზე, მაუწყებლები ვალდებულნი არიან, შექმნან მომხმარებელთა საჩივრების განხილვის ეფექტიანი მექანიზმები.

თუ თვლით, რომ თქვენს მიმართ მაუწყებლის მხრიდან ქცევის კოდექსის დარღვევას ჰქონდა ადგილი, შეავსეთ მოცემული ანკეტა და თქვენს ინტერესებს მედია საშუალებასთან ურთიერთობაში მედიის განვითარების ფონდი წარმოადგენს.
VNKNH
გაგზავნა

განცხადებები

თარიღი: 04 აგვ 2014

სამოქალაქო პლატფორმაში „არა ფობიას!“ შემავალი არასამთავრობო ორგანიზაციების განცხადება

ვეხმაურებით საჩხერეს "ჩიხურას" უკანასკნელი მატჩების დროს მომხდარ ინციდენტებს, რამაც ჩრდილი მიაყენა არა მხოლოდ ქართული სპორტს, არამედ საქართველოს სახელმწიფო ინტერესები და მისი საერთაშორისო იმიჯიც დააზარალა.

 

2014 წლის 24 ივლისს, თბილისში, ლოკომოტივის სტადიონზე საჩხერის "ჩიხურასა" და თურქეთის "ბურსასფორს" შორის ევროპის ლიგის შესარჩევი მატჩი გაიმართა, რა დროსაც გამარჯვების მომტანი გოლის ავტორმა ფეხბურთელმა თორნიკე მუმლაძემ შეურაცხმყოფელი ჟესტი აჩვენა თურქ გულშემატკივარს. აღნიშნულს მოყვა გუნდების გულშემატკივრების, ფეხბურთელების და მოგვიანებით, მედიის წარმომადგენლების დაპირისპირებაც. იმავე მატჩის მსვლელობის დროს ქართველი გულშემატკივრების ნაწილმა ნაცისტური მისალმებითა და დროშით ანტითურქული გამოსვლაც მოაწყო.

 

ზემოაღნიშნულის გამო, უეფამ საჩხერის გუნდს სანქციები დაუწესა - ქართული კლუბი 15 ათასი ევროთი დაჯარიმდა, მომდევნო შეხვედრებზე კი სტადიონის ტრიბუნები დახურული იქნება.

 

ერთ კვირის შემდეგ, იმავე გუნდის თამაშის დროს ნაციონალისტურ ნიადაგზე მაპროვოცირებელი ნიშნების შემცველი ქმედება კვლავ განხორციელდა: 31 ივლისს ბაქოში გამართულ შეხვედრაზე გულშემატკივრების მიერ გამოფენილ საქართველოს რუკაზე აზერბაიჯანის ტერიტორიების ნაწილიც იყო დატანილი.

 

მართალია აღნიშნულის გამო, მოგვიანებით, "ჩიხურას" პრეზიდენტმა ბოდიშიც მოიხადა, მაგრამ აღსანიშნავია, რომ ზემოთ აღწერილ ინციდენტებზე, თუ საქართველოს სპორტის მინისტრის ლაკონურ კომენტარს არ ჩავთვლით, უეფას სანქციები ერთადერთი ოფიციალური პასუხი აღმოჩნდა, არც ფეხბურთის ფედერაციას, რომელიც საკუთარ ინტერნეტ გვერდზე "ჩიხურას" 24 ივლისის გამარჯვებას "გმირულს" უწოდებს და არც სპორტისა და ახალგაზრდობის საქმეთა სამინისტროს პასიურობა მიანიშნებს, რომ თავდაპირველად მომხდარ ინციდენტზე მათი რეაქცია სუსტი და არასათანადო იყო, რის გამოც გაცილებით საშიში და ქვეყნისთვის საფრთხილო პროვოკაციის მომსწრენი გავხდით.  ასეთი მიდგომა, ჩვენი აზრით, შემდგომშიც წაახალისებს იმავე ხასიათის ქმედებებს, როგორც ფეხბურთელების, ასევე  მათი გულშემატკივრის მხრიდან.

 

ასევე, მიგვაჩნია, რომ სამართალდამცავი ორგანოების წარმომადგენლებს, რომლებიც ლოკომოტივის სტადიონზე გამართულ მატჩს ესწრებოდნენ, უფრო აქტიურად უნდა ემოქმედათ დაპირისპირებების თავიდან ასაცილებლად, კერძოდ კი, დაუყოვნებლივ უნდა აღეკვეთათ ნაცისტური გამოსვლები, ხოლო დაპირისპირებაში მონაწილე პირების მიმართ კანონით გათვალისწინებული საშუალებებით უნდა ემოქმედათ.

 

  • მოვუწოდებთ საქართველოს ფეხბურთის ფედერაციას, სერიოზულად მოეკიდოს სპორტული ღონისძიებების მიმდინარეობისას გამოვლენილ დისკრიმინაციულ ქმედებებს და შესაბამისი სანქციები დაუწესოს ინციდენტში მონაწილე სპორტსმენებსა და კლუბებს.

  • მოვუწოდებთ საქართველოს სპორტისა და ახალგაზრდობის საქმეთა სამინისტროს, ოფიციალური შეფასება მისცეს ზემოთ აღწერილ ინციდენტებს და სხვადასხვა სპორტულ ფედერაციებთან ერთად პრევენციული ღონისძიებები გაატაროს მომავალში მსგავსი ინციდენტების თავიდან ასაცილებლად.

  • მოვუწოდებთ საქართველოს შინაგან საქმეთა სამინისტროს, ადეკვატური რეაგირება მოახდინოს ეთნიკური და სხვა ნიშნით დისკრიმინაციის ფაქტებზე და შესაბამისი ღონისძიებები გაატაროს მომავალში დისკრიმინაციის საჯარო გამოვლინებების, ასევე, სიძულვილით მოტივირებული სამართალდარღვევების პრევენციისა და აღკვეთისთვის.


საქართველოს დემოკრატიული ინიციატივა, GDI

 

მედიის განვითარების ფონდი, MDF

 

იდეონტობა

 

ტოლერანტობის და მრავალფეროვნების ინსტიტუტი, TDI

 

საქართველოს რეფორმების ასოციაცია, GRASS

 

საფარი

 

ადამიანის უფლებების სწავლებისა და მონიტორინგის ცენტრი,EMC

 

უმცირესობათა საკითხების ევროპული ცენტრი, ECMI

 

კონსტიტუციის 42- მუხლი

უკან